Një banesë dykatëshe është përfshirë nga flakët pasditen e kësaj të hëne në zonën e Fier-Sheganit, ku jetonte një çift të moshuarish.
Zjarri ka nisur në katin e poshtëm të banesës, ndërsa sapo kanë konstatuar flakët, familjarët kanë njoftuar menjëherë shërbimin zjarrfikës. Të afërm dhe banorë të zonës kanë ndërhyrë me shpejtësi duke ndihmuar dy bashkëshortët e moshuar të dilnin nga banesa pa pësuar dëmtime.
Në vendngjarje kanë mbërritur dy mjete zjarrfikëse nga Lushnja, të cilat kanë bërë të mundur izolimin e flakëve dhe kanë parandaluar përhapjen e zjarrit në banesat përreth.
Pas ndërhyrjes së forcave zjarrfikëse, situata është vënë nën kontroll, ndërsa një ambulancë ka mbërritur në zonë për të kontrolluar gjendjen shëndetësore të dy të moshuarve.
Sipas të dhënave paraprake nga zjarrfikësit e Lushnjës, dyshohet se shkak i zjarrit ka qenë një shkëndijë elektrike, ndërsa vijojnë verifikimet për përcaktimin e saktë të rrethanave të ngjarjes.
