Autoritetet në Delhi kanë kërkuar që shkollat të organizojnë mësime hibride për nxënësit e shkollës fillore dhe kanë ndaluar aktivitetet ndërtimore jo të nevojshme për shkak të përkeqësimit të cilësisë së ajrit në kryeqytet. Të martën, u miratuan masa më të rrepta ndaj ndotjes, përfshirë kufizimin e lëvizjes së mjeteve të transportit të mallrave në Delhi dhe në periferi. Sipas autoriteteve, cilësia e ajrit në Delhi ka arritur nivele “të rënda”, që ndikon jo vetëm tek ata që kanë probleme shëndetësore, por gjithashtu edhe në individë të shëndetshëm.
Të mërkurën, niveli i PM2.5 në ajër arriti 438, sipas Bordit Qendror të Kontrollit të Ndotjes, një përqendrim alarmant që mund të bllokojë mushkëritë. Kjo është pothuajse 30 herë më e lartë se kufiri i sigurt i vendosur nga Organizata Botërore e Shëndetësisë (OBSH) dhe rreth tetë herë më e lartë se mesatarja kombëtare e Indisë. Mjekët kanë rekomanduar që njerëzit, veçanërisht fëmijët dhe të moshuarit, të shmangin daljet jashtë dhe të përdorin maska mbrojtëse nëse është e nevojshme.
Problemi i cilësisë së ajrit është i përsëritur në Delhi dhe disa pjesë të Indisë veriore gjatë dimrit. Nuk ka një shkak të vetëm për këtë situatë; një kombinim faktorësh si shpejtësitë e ulëta të erës, emisioet industriale, gazrat e automjeteve, ulja e temperaturave dhe djegia sezonal e mbetjeve të kulturave në shtetet fqinj po kontribuojnë në këtë ndotje. Qeveria e Delhit ka zbatuar një plan të veçantë të masave, të quajtur Graded Response Action Plan (GRAP), për të kontrolluar nivelet e ndotjes.
Masa e tretë e këtyre masave u zbatua të martën, duke përfshirë ndalimin e aktiviteteve të minierave dhe lëvizjes së automjeteve që gjenerojnë pluhur. Përkeqësimi i cilësisë së ajrit solli protesta nga qytetarët dhe shkaktoi një debat politik. Saurabh Bhardwaj, një udhëheqës i Partisë Aam Aadmi (AAP), akuzoi qeverinë e Delhit për “manipulimin” e të dhënave të cilësisë së ajrit, ndërsa qeveria e udhëhequr nga Partia Bharatiya Janata (BJP) e mohoi këto akuza, duke theksuar përkushtimin e saj ndaj kontrollit të ndotjes.
