Shtetet e Bashkuara kanë siguruar kualifikimin në fazën e 1/32-ve të Botërorit 2026, pas fitores ndaj Australisë në Seattle.
Skuadra e Mauricio Pochettinos e nisi ndeshjen me shumë ritëm dhe e zhbllokoi shpejt rezultatin. Balogun shpërtheu me shpejtësi në krah dhe pasimi i tij në zonë u devijua gabimisht nga Burgess, i cili shkaktoi autogol dhe i dha avantazhin amerikanëve.
SHBA dominoi sidomos në pjesën e parë, duke kontrolluar mesfushën dhe duke mos i dhënë shumë hapësira Australisë, që vinte me reputacionin e një skuadre të fortë në mbrojtje.
Pochettino ndryshoi formacionin, sidomos për shkak të mungesës së Pulisic, duke përdorur një skemë me tre qendërmbrojtës. Ream, Richards dhe Freeman garantuan siguri prapa, ndërsa Robinson dhe Dest dhanë gjerësi në krahë.
Goli i dytë erdhi nga Freeman, i cili vulosi fitoren dhe i dha SHBA-së tri pikë të tjera shumë të rëndësishme. Me këtë sukses, amerikanët shkojnë në kuotën e gjashtë pikëve dhe arrijnë dy fitore radhazi në Botëror për herë të parë që nga viti 1950.
Në pjesën e dytë, ritmi i SHBA-së ra ndjeshëm. Australia tentoi të reagonte me hyrjen e Irankunda dhe Metcalf, por pa arritur të ndryshonte fatin e ndeshjes.
Për amerikanët, objektivi i parë është arritur: kualifikimi është siguruar dhe tani skuadra e Pochettinos pret të mësojë kundërshtarin në fazën me eliminim direkt.
