Autoritetet amerikane kanë sekuestruar më shumë se 600 dronë pranë stadiumeve dhe zonave të tifozëve të Kupës së Botës që nga nisja e turneut, më 11 qershor, njoftoi të hënën Administrata e Sigurisë së Transportit (TSA).
Sipas autoriteteve, në ditët e ndeshjeve ndalohet çdo aktivitet fluturues, përfshirë dronët, brenda një rrezeje prej tre miljesh detare dhe deri në 3,000 këmbë (rreth 914 metra) mbi tokë rreth stadiumeve, përveç rasteve kur ka autorizim të posaçëm nga kontrolli i trafikut ajror.
Byroja Federale e Hetimit (FBI) bëri të ditur se dronë janë sekuestruar në zonat e hapësirës ajrore të kufizuar në të 11 qytetet amerikane që presin ndeshjet e Kupës së Botës.
Vetëm në Miami janë sekuestruar 130 dronë, ndërsa në Dallas më shumë se 70, gjatë zhvillimit të pesë ndeshjeve. Ndërkohë, Administrata Federale e Aviacionit (FAA) ka ndaluar fluturimet e dronëve edhe mbi zonat e grumbullimit të tifozëve. Në këto zona, kufizimi zbatohet brenda një rrezeje prej një milje detare dhe deri në 1,000 këmbë (rreth 305 metra) mbi tokë.
FBI paralajmëron se operatorët që fluturojnë dronë pa autorizim në hapësirën ajrore të kufizuar mund të përballen me gjoba deri në 100 mijë dollarë, ndjekje penale dhe sekuestrim të pajisjes. Për këtë arsye, ekipe të specializuara të FBI-së janë dislokuar pranë stadiumeve për të identifikuar dhe neutralizuar çdo dron të paautorizuar.
Javën e kaluar, autoritetet ngritën akuza ndaj Cristobal Torres Alvarez, një shtetas meksikan 40-vjeçar, i cili dyshohet se fluturoi një dron në hapësirën ajrore të kufizuar pranë stadiumit në Dallas përpara zhvillimit të një ndeshjeje.
Në vitin 2025, Presidenti Donald Trump nënshkroi një urdhër ekzekutiv për forcimin e mbrojtjes së Shteteve të Bashkuara ndaj kërcënimeve që lidhen me dronët. Në kuadër të këtij plani, Departamenti i Sigurisë Kombëtare vendosi sisteme të reja kundër dronëve përgjatë kufirit SHBA-Meksikë në shtetin e Teksasit.
Autoritetet amerikane theksojnë se vitet e fundit janë regjistruar disa incidente me dronë gjatë aktiviteteve të mëdha sportive. Në vitin 2025, një person u shpall fajtor për shkelje të hapësirës ajrore të mbrojtur pasi fluturoi një dron mbi një ndeshje të fazës “playoff” të NFL-së në Baltimore.
