Shqipëria ka siguruar një kredi prej 302 milionë dollarësh nga Shtetet e Bashkuara të Amerikës për modernizimin e Forcave të Armatosura.
Marrëveshja, e miratuar në kuadër të programit amerikan Foreign Military Financing (FMF), synon forcimin e kapaciteteve ushtarake shqiptare dhe mbështetjen e angazhimeve të vendit në NATO.
Ambasada e SHBA në Tiranë bëri të ditur ratifikimin dhe nënshkrimin e marrëveshjes, duke sqaruar se financimi do të ndihmojë Shqipërinë në përmbushjen e objektivit për rritjen e shpenzimeve të mbrojtjes në 5% të Prodhimit të Brendshëm Bruto deri në vitin 2035.
Sipas përfaqësisë diplomatike amerikane, kredia do të përdoret për blerjen e kapaciteteve me origjinë amerikane, të cilat do të shërbejnë për përmirësimin e pajisjeve dhe aftësive të Forcave të Armatosura shqiptare.
Marrëveshja prej 302 milionë dollarësh u miratua javën e kaluar në Kuvendin e Shqipërisë me 74 vota nga mazhoranca, pasi u fut në rendin e ditës me procedurë të përshpejtuar.
Partia Demokratike nuk mori pjesë në seancë, duke kundërshtuar procedurën dhe duke e çuar çështjen në Gjykatën Kushtetuese.
Financimi amerikan vjen në kuadër të bashkëpunimit strategjik mes dy vendeve dhe lidhet me angazhimet e Shqipërisë si vend anëtar i NATO-s. Kredia pritet të ndikojë në modernizimin e strukturave të mbrojtjes dhe rritjen e gatishmërisë operacionale të ushtrisë shqiptare.
