Një pasagjer shqiptar i Delta Airlines u dënua me 18 muaj burg pasi tentoi të hapte derën e emergjencës dhe u përplas me ekuipazhin gjatë një fluturimi. Bëhet fjalë për 24-vjeçarin Mario Nikprelaj , me origjinë shqiptare dhe banues në Miçigan, i cili pranoi fajësinë, sipas autoriteteve të Ajovës.
Ngjarja ndodhi në një fluturim të SkyWest nga Nebraska drejt Detroitit. I riu u soll në mënyrë agresive, refuzoi të vendoste rripin e sigurimit, u ngrit disa herë gjatë ngritjes së avionit dhe ofendoi pasagjerët dhe stafin. Ai shtyu dhe kërcënoi një stjuardesë, ndërsa më vonë u pa duke manipuluar derën e emergjencës, duke shkaktuar panik në kabinë.
Avioni u detyrua të bënte ulje emergjente në Ajovë. Pas arrestimit, autoritetet gjetën 41 pilula qetësuese në posedim të tij. 24-vjeçari u përball me disa akuza penale dhe rezultoi me një të kaluar të rëndë kriminale, përfshirë dhunë dhe vepra të lidhura me drogën.
