Vedat Muriqi po kalon atë që shumëkush e ka cilësuar si sezonin më të mirë të karrierës për sulmuesin e Kosovës. Golat e tij po ndihmojnë Majorkën të mbijetojë në La Liga dhe i kanë dhënë pikë të rëndësishme, siç ishin ato në ndeshjen ndaj Real Madrid ku sulmuesi shënoi në shtesë për fitoren 2-1.
Ai ka arritur kuotën e 19 golave në kampionatin spanjoll, vetëm 4 pas Kilian Mbape i cili mban vendin e parë në renditjen e golashënuesve më të mirë. Kjo kuotë golash i ka mundësuar Muriqit që t’i afrohet edhe më shumë podiumit në renditjen e “Këpucës së Artë” në Europë, teksa objektivi i tij është Erling Haland, i cili mban vendin e tretë me 44 pikë falë 22 golave të shënuar në kampionatin anglez.
Duke qenë në një nga 5 ligat kryesore në kontinent, golat e shënuar nga këta futbollistëve vlerësohen me 2 pikë, ndërsa në disa liga të tjera koeficienti është 1,5 dhe 1 në varësi të nivelit të kampionatit.
RENDITJA EUROPIANE
Herri Kejn (Bajern Mynih) 62
Kilian Mbape (Real Madrid) 46
Erling Haland (Mançester Siti) 44
Igor Tiago (Brentford) 38
Vedat Muriqi (Majorka) 38
Luis Suarez (Sporting Lisbonë) 36
Deniz Undav (Shtutgart) 36
Ajase Ueda (Fejenord) 33
Dion Beljo (Dinamo Zagreb) 33
Paul Onuaçu (Trabzonspor) 33
Lautaro Martinez (Inter) 32
Hoakin Panikeli (Strasburg) 32
Esteban Lepaul (Ren) 32
