Policia austriake ka arrestuar dy persona të dyshuar për trafik droge në Vjenë, një 32-vjeçar austriak dhe një 37-vjeçar shqiptar.
Sipas mediave të huaja, operacioni është zhvilluar në zonën e Leopoldstadt, pas nisjes së një hetimi ndaj 37-vjeçarit shqiptar, i cili kishte tërhequr vëmendjen e policisë për shkak të sjelljes së dyshimtë.
Efektivët e vendosën atë nën vëzhgim dhe më pas konstatuan një takim me 32-vjeçarin austriak. Gjatë takimit, shqiptari vendosi një çantë shpine në automjetin e 32-vjeçarit.
Policia ndërhyri dhe kontrolloi automjetin, ku gjeti më shumë se 1 kilogram kanabis. Pak më vonë, efektivët ndaluan edhe automjetin e 37-vjeçarit shqiptar, i cili u arrestua pavarësisht rezistencës gjatë ndërhyrjes.
Hetimi vijoi me kontrolle në dy apartamente, ku policia zbuloi sasi të tjera të konsiderueshme droge. Në total u sekuestruan rreth 17 kilogramë marihuanë, 1.5 kilogramë kokainë dhe 60 gramë Crystal Meth.
Gjatë operacionit u sekuestruan gjithashtu disa telefona celularë dhe rreth 160 euro cash.
Sipas autoriteteve austriake, dy të arrestuarit dyshohen se janë të përfshirë në aktivitetin e shpërndarjes së lëndëve narkotike. Hetimet vijojnë për të përcaktuar rolin e secilit prej tyre dhe për të zbardhur nëse pas sasisë së sekuestruar qëndron një rrjet më i gjerë i trafikut të drogës.
