Derbi Milan-Inter do të luhet me kapacitetin maksimal të “San Siro”-s, pasi janë hequr kufizimet që prej vitit 2019 kishin mbajtur të mbyllura disa sektorë të unazës së tretë.
Për sfidën e nesërme do të rikthehen në dispozicion rreth 2,350 vende shtesë në Terzo Anello Blu dhe Terzo Anello Verde, duke bërë të mundur që stadiumi të jetë realisht “sold out”.
Herën e fundit që “San Siro” funksionoi me kapacitet të plotë në një derbi ishte më 17 mars 2019, kur në stadium ishin 77,479 spektatorë.
Kufizimet ishin vendosur në verën e vitit 2019 pas shqetësimeve për vibrimet që ndiheshin në disa zona të unazës së tretë. Sipas teknikëve, nuk bëhej fjalë për një problem të drejtpërdrejtë sigurie, por për një masë menaxhuese për të shmangur shqetësimin dhe panikun mes tifozëve.
Heqja e kufizimeve do të vlejë për ndeshjet e kampionatit dhe Kupës së Italisë. Në kompeticionet europiane, megjithatë, disa kufizime do të vazhdojnë të aplikohen në sektorët e tifozëve udhëtues.
Vetëm pak orë pas prezantimit të projektit të stadiumit të ri që pritet ta zëvendësojë në vitet e ardhshme, “San Siro” përgatitet kështu për një tjetër mbrëmje të madhe.
Derbi i Milanit do të ketë atmosferë maksimale dhe tribuna të mbushura deri në vendin e fundit.
