Me certifikimin e rezultatave për zgjedhjet parlamentare të 11 majit, fillon gjithashtu dhe numërimi mbrapsht për partitë politike që të depozitojnë pranë Komisionit Qendror të Zgjedhjeve deklaratat e shpenzimeve për fushatën. Interesi më i madh rreth këtyre raportimeve përqendrohet te shpenzimet e dy forcave kryesore, Partisë Socialiste dhe Partisë Demokratike.
Një sërë shpenzimesh të demokratëve, duke përfshirë ato për lobistin Chris LaCivita, mbeten ende të panjohura. Sali Berisha, lideri i kësaj partie, ka qenë i kujdesshëm për të zbuluar detajet mbi pagesat, por ka siguruar se të dhënat do të bëhen publike sapo të përmbushen detyrimet ligjore për dorëzimin e tyre të KQZ. Ai ka afat deri në fund të tetorit për të dorëzuar këtë informacion.
Nga ana tjetër, raportet financiare për kandidatët e Partisë Socialiste tregojnë se Olsi Komiçi, ish-komisioner i Vettingut, ka shpenzuar mbi 25 mijë euro gjatë fushatës. Sara Mila, kandidatja më e votuar në Elbasan, ka deklaruar se ka shpenzuar 9 mijë euro. Ndërkohë, në Vlore, Ardit Bido ka investuar rreth 20 mijë euro, teksa Damian Gjiknuri ka shpenzuar 10 mijë euro. Ministri i Drejtësisë, si drejtues politik në Lezhë, është shfaqur shumë më i kursyer me vetëm 3 mijë euro.
Mes demokratëve, Gjin Gjoni është raportuar të ketë shpenzuar 10 mijë euro, ndërsa Belind Këlliçi rreth 8 mijë euro. Në krahasim, Jozefina Topalli dhe Agron Gjekmarkaj kanë shpenzuar vetëm 1 mijë e 500 euro. Sali Berisha ka deklaruar zero shpenzime, duke thënë se partia mbulon kostot, njësoj si Edi Paloka e Flamur Noka. Po ashtu, disa kandidatë të PS si Endrit Brahimllari dhe Zegjine Çaushi kanë raportuar zero shpenzime.
Të gjitha shpenzimet do të kalojnë në auditim nga KQZ, dhe çdo mospërputhje do të sjellë sanksione për partitë dhe kandidatët. Aktualisht, nuk ka ende raportime për shpenzimet e Edi Ramës.
