Një gjeneral i lartë i NATO-s ka deklaruar se Rusia po përparon shumë ngadalë në terren, duke marrë disa territore, por me kosto shumë të lartë në jetë njerëzish, veçanërisht në anën ruse.
Në një deklaratë për mediat ndërkombëtare, ai theksoi se ndihmat për Ukrainën nuk do të ndalen, ndërsa shtoi se Kievi është ende në gjendje të mbajë vijën e frontit falë mbështetjes së aleatëve.
“Nuk është kurrë e mjaftueshme, por është e mjaftueshme për ta mbajtur Ukrainën në luftë. Çdo ditë shohim përparim shumë të ngadalë rus, me shumë ushtarë të vrarë në anën ruse. Kjo tregon se Ukraina po arrin të mbrojë vijën e frontit dhe hapësirën ajrore”, u shpreh gjenerali.
Ai theksoi se Evropa duhet të bëjë më shumë për sigurinë e saj, duke pranuar se në të kaluarën angazhimi nuk ka qenë i mjaftueshëm. Sipas tij, lufta në Ukrainë lidhet drejtpërdrejt me sigurinë evropiane.
Gjenerali vuri në dukje gjithashtu se angazhimi i Shteteve të Bashkuara ndaj Ukrainës mbetet i fortë dhe i palëkundur, gjë që, sipas tij, reflektohet edhe në bashkëpunimin e përditshëm me forcat amerikane në Gjermani dhe në vende të tjera të Evropës.
“Nuk shoh asnjë shenjë të tërheqjes së mbështetjes për Ukrainën, megjithëse vendimet përfundimtare do të varen edhe nga zhvillimet politike”, përfundoi ai.
