Porti i Durrësit ka përfunduar dhjetëmujorin e parë të vitit 2025 me rezultate rekord, duke shënuar rritje në të gjithë treguesit kryesorë të aktivitetit.
Nga të dhënat zyrtare rezulton se gjatë periudhës janar-tetor, porti ka përpunuar mbi 3.2 milionë tonë mallra, që përbën një rritje prej 7.28% krahasuar me të njëjtën periudhë të vitit të kaluar, duke e konkretizuar këtë rritje me 219 mijë tonë më shumë mallra.
Shqetësuese është rritja e importeve, e cila ka shënuar një rritje prej 27%, duke arritur në 2,442,518 tonë.
Kjo tregon zgjerimin e kërkesës së brendshme dhe thekson rolin e rëndësishëm të portit si një qendër furnizimi dhe distribuimi.
Nga ana tjetër, eksportet përbëjnë 783,478 tonë të totalit të mallrave, duke reflektuar një aktivitet të mirë në tregjet ndërkombëtare.
Sektori i konteinerëve gjithashtu ka shënuar një rritje të ndjeshme, me 189,835 TEU të përpunuar, që përfaqëson një rritje prej 15% në krahasim me vitin e kaluar.
Kjo rritje pasqyron intensifikimin e flukseve të mallrave të konteinerizuara dhe përmirësimin e eficiencës në zinxhirin e furnizimit.
Lëvizja e pasagjerëve ka qenë gjithashtu në rritje, me 694,310 udhëtarë që kanë kaluar nëpër Portin e Durrësit, që është 11,597 më shumë se vitin e kaluar. Po ashtu, përqindja e rritjes është 5%, duke e konfirmuar portin si një pikë kyçe për turizmin dhe lëvizjen e njerëzve.
Gjatë dhjetëmujorit, porti ka regjistruar gjithashtu 1,764 anije tregtare dhe mjete të tjera lundruese, simbolizuar intensitetin operativ në rritje dhe kapacitetin e përpunimit.
Sipas APD-së, Durrësi vazhdon të jetë nyja më e rëndësishme detare dhe logjistike e Shqipërisë, duke përmbushur kërkesat e tregut dhe duke siguruar standarde të larta operimi, duke konfirmuar rolin e tij strategjik në zhvillimin ekonomik të vendit.
