Një aksident ajror tragjik ka ndodhur në lagjen Murphy Canyon të San Diegos, ku një avion i vogël u rrëzua duke shkaktuar vdekjen e të gjashtë personave në bord. Autoritetet amerikane konfirmuan se mes viktimave është edhe agjenti i njohur muzikor Dave Shapiro.
Avioni u përplas në një zonë të banuar, duke dëmtuar disa automjete dhe shtëpi. Sipas hetimeve paraprake të Bordit Kombëtar për Sigurinë e Transportit (NTSB), një sërë faktorësh, përfshirë motin me mjegull dhe probleme me infrastrukturën e aeroportit, mund të kenë kontribuar në aksident.
Investigatori Dan Baker bëri të ditur se në momentin e përplasjes, dritat e pistës nuk ishin funksionale dhe as sistemi paralajmërues për kushtet e motit. Sipas komunikimeve të publikuara nga LiveATC.net, piloti kishte shprehur shqetësime për motin dhe diskutonte me kontrollin ajror për një devijim të mundshëm drejt një aeroporti tjetër.
Ndërkohë, Administrata Federale e Aviacionit (FAA) kishte paralajmëruar më parë për mosfunksionimin e dritave të pistës, por nuk është e qartë nëse piloti ishte i informuar për këtë fakt.
Përpjekja për ulje përfundoi tragjikisht, pasi avioni nuk arriti dot pistën dhe u përplas në tokë, duke i marrë jetën të gjithëve në bord. Hetimet për shkaqet e plota të aksidentit janë ende në vazhdim.
