Cristiano Ronaldo ka zbuluar se nuk e ka në plan të tërhiqet nga futbolli derisa të arrijë shifrën e 1,000 golave në karrierë. 40-vjeçari ndodhet aktualisht në kuotën e 956 golave, pasi shënoi dopietë në fitoren 3-0 të Al-Nassr ndaj Al Akhdoud.
Duke folur në Globe Soccer Awards në Dubai, portugezi theksoi se motivimi i tij mbetet i lartë dhe se kënaqësia për të luajtur nuk varet nga kampionati ku aktivizohet. “Është e vështirë të vazhdosh, por jam i motivuar… dua të vazhdoj. Nuk ka rëndësi ku luaj, në Lindjen e Mesme apo në Europë. Unë gjithmonë e shijoj futbollin,” u shpreh Ronaldo, duke nënvizuar se objektivi i tij është i qartë: trofe dhe shifra 1000, për sa kohë që nuk e pengojnë dëmtimet.
Ronaldo ka konfirmuar më herët se Kupa e Botës 2026 pritet të jetë turneu i tij i fundit me kombëtaren. Ndërkohë, në Arabinë Saudite ai po vazhdon të sfidojë moshën me paraqitje të forta: këtë sezon raportohet si bashkë-kryegolashënues i Saudi Pro League me 12 gola në 10 ndeshje, ndërsa me Al-Nassr numëron 112 gola në 125 ndeshje në të gjitha kompeticionet.
Pavarësisht statistikave personale, Al-Nassr ka fituar vetëm Arab Club Champions Cup 2023 që nga ardhja e tij, por këtë sezon skuadra thuhet se është në pozicion shumë të mirë për titullin e kampionatit, me seri perfekte fitoreje. Për të ardhmen e tij kishte spekulime për shkak të skadimit të kontratës në qershor, por Ronaldo e zgjati marrëveshjen me klubin me dy vite.
Në karrierën e tij, Ronaldo mban rekordin e golave me Real Madrid (450) dhe me Portugalinë (143), ndërsa ka veçantinë të jetë i vetmi lojtar që ka shënuar mbi 100 gola për Real Madrid, Manchester United, Juventus dhe Al-Nassr.
