Legjenda braziliane Ronaldinho është rikthyer zyrtarisht në futbollin profesionist pas 11 vitesh mungesë, duke luajtur për Ravennën në fitoren 2-0 ndaj Forlìt, në Serie C italiane.
Ish-ylli i Barcelonës dhe Milanit e nisi ndeshjen si titullar, me fanellën me numrin 10, dhe qëndroi në fushë gjatë gjithë pjesës së parë. Pavarësisht mungesës së gjatë, Ronaldinho tregoi disa momente nga klasi i tij, duke kontribuar edhe në aksionin që solli golin e parë të Ravennës, të realizuar nga Giulio Donati në minutën e 36-të. Simone Rabbi vulosi fitoren në pjesën e dytë.
Rikthimi i 46-vjeçarit krijoi një atmosferë të jashtëzakonshme në stadiumin Bruno Benelli, ku rreth 7 mijë tifozë e pritën me duartrokitje. Në përfundim të pjesës së parë, braziliani përshëndeti publikun, duke marrë një tjetër ovacion.
Pas ndeshjes, fituesi i Topit të Artë të vitit 2005 nuk e përjashtoi mundësinë e një tjetër paraqitjeje.
“Ishte gjithçka shumë e shpejtë. Nuk e di ende nëse kjo ishte ndeshja ime e fundit. Nëse presidenti më telefonon, unë rikthehem”, u shpreh Ronaldinho.
Ndeshja e tij e fundit përpara këtij rikthimi kishte qenë në shtator të vitit 2015, me Fluminensen në Brazil.
Një nga futbollistët më spektakolarë të historisë dëshmoi se, edhe pas 11 vitesh larg fushës, dashuria për futbollin mbetet e pandryshuar.











