Kombëtarja e Spanjës ka mbërritur në Pallatin Moncloa, ku është pritur nga kryeministri Pedro Sánchez pas triumfit në Kupën e Botës.
Kjo ishte ndalesa e dytë e turit zyrtar të kampionëve, pas pritjes nga Familja Mbretërore në Pallatin Zarzuela. Më pas, skuadra do të vazhdojë festimet së bashku me tifozët në rrugët e Madridit.
Kapiteni Rodri Hernández pranoi se ky është titulli më i veçantë i karrierës së tij.
“Të fitosh me vendin tënd është gjëja më e bukur që ekziston, veçanërisht në një Kupë Bote. Kjo gjeneratë është rritur duke parë Casillas dhe Iniestën duke ngritur trofeun. Fakti që sot arritëm ta bënim edhe ne, është gjëja më e madhe që mund të arrish në futboll”, deklaroi mesfushori.
Rodri pranoi gjithashtu se finalja ndaj Argjentinës ishte ndeshja më e vështirë e gjithë turneut, pavarësisht se Spanja arriti ta kontrollonte mirë kundërshtarin.
Edhe Ferran Torres shprehu lumturinë për festën me tifozët spanjollë, duke theksuar emocionin e fëmijëve që përjetuan nga afër një moment historik për kombëtaren.
Me këtë sukses, Spanja kurorëzoi një brez futbollistësh që ka shkruar një faqe të re në historinë e saj.
