Real Madrid po përgatit një tjetër lëvizje të madhe në merkato, me Michael Olise që ka dalë si një nga objektivat kryesorë të Florentino Pérez.
Sulmuesi anësor i Bayern Munich ka zhvilluar një sezon të jashtëzakonshëm dhe është kthyer në një nga lojtarët më të kërkuar në Evropë. Paraqitjet e tij me bavarezët kanë rritur ndjeshëm vlerën e tij, ndërsa interesi i madrilenëve tashmë është konkret.
Sipas raportimeve, Florentino është gati të paraqesë një ofertë prej 150 milionë eurosh për Olise nëse fiton zgjedhjet te Real Madrid. Nëse marrëveshja realizohet, francezi do të bëhej transferimi më i shtrenjtë në historinë e klubit madrilen.
Olise u transferua te Bayern në verën e vitit 2024 nga Crystal Palace për 52 milionë euro, por gjatë sezonit të fundit ka bërë një hap të madh përpara, duke u konsoliduar si një nga lojtarët më të vlefshëm në futbollin evropian.
Pozicioni i tij natyral është krahu i djathtë i sulmit, një rol ku Real Madrid nuk ka një specialist të qartë. Me këmbën e majtë të fuqishme dhe aftësinë për të hyrë drejt qendrës, Olise shihet si një profil që mund t’i japë skuadrës një dimension të ri ofensiv.
Megjithatë, operacioni nuk pritet të jetë i lehtë. Bayern Munich është një klub financiarisht i fortë dhe nuk ka nevojë të shesë. Për këtë arsye, madrilenët do të duhet të bëjnë një ofertë shumë të lartë për të bindur bavarezët.
Në moshën 24-vjeçare, Olise konsiderohet ende një lojtar me potencial të madh për t’u rritur më tej. Pikërisht për këtë arsye, Real Madrid e sheh si një investim madhor për të ardhmen e projektit të ri sportiv.
