GAZA- Zyra e OKB-së për të Drejtat e Njeriut përmes një deklarate ka dënuar numrin e lartë të civilëve të vrarë në luftën në Gaza, duke thënë se rreth 70% e viktimave gjatë një periudhe gjashtëmujore ishin gra dhe fëmijë.
Agjencia tha se verifikoi detajet e 8,119 personave të vrarë në Gaza nga nëntori 2023 deri në prill 2024, ku rezultoi se 40% e viktimave ishin fëmijë dhe 26% gra. Fëmijët i përkisnin moshave nga 5-9 vjeç. Sipas agjencisë, rreth 80% e viktimave u vranë në ndërtesa banimi ose të ngjashme.
Sipas OKB-së, numri i lartë ishte kryesisht për shkak të përdorimit të armëve nga Izraeli në zona me popullsi të dendur, megjithëse disa vdekje mund të kenë qenë rezultat i predhave të përdorura nga grupet e armatosura palestineze. Në raport, thuhet se u gjetën nivele të larta të shkeljeve të ligjit ndërkombëtar, duke ngritur shqetësime rreth “krimeve të luftës dhe krimeve të tjera të mundshme mizorie”.
“Ky nivel i paprecedentë i vrasjeve dhe plagosjeve të civilëve është pasojë e drejtpërdrejtë e dështimit për të respektuar parimet themelore të së drejtës ndërkombëtare humanitare”, u shpreh shefi i agjencisë për të Drejtat e Njeriut Volker Türk.
Izraeli në të kaluarën ka thënë se synon Hamasin dhe ndërmerr hapa për të zbutur rrezikun ndaj civilëve duke përdorur municione të sakta që nuk do të lëndojnë civilët.
