Kryeministri Edi Rama dhe homologia e tij daneze, Mette Frederiksen mbajtën një konferencë të përbashkët për mediat në përfundim të Samitit të Europës që u zhvillua ditën e sotme në Tiranë.
Në fjalën e tij kryeministri Rama tha se është mjaft krenar dhe i gëzuar për gjithçka ndodhi ditën e sotme në Tiranë, ku liderët e Europës diskutuan për të ardhmen ekontinentit.
“Kryeministrja e Frederiksen po merr stafetën nga Tirana dhe po e çon atë në Kopenhagen. U mblodhëm bashkë liderët e Europës për të zhvilluar një diskutim të rëndësishëm intensiv dhe mjaft të hapur për një Evropë të re për një botë të re që ishte dhe titulli kryesor i këtij Samiti. Kam vërtetë kënaqësi që them që qysh prej fillimit, sot në Tiranë kemi një përkushtim të ripërtëritur ndaj kontinentit tonë dhe qytetarëve tanë për t’i mbajtur fort bashkë vlerat dhe parimet që udhëheqin shoqëritë tona për të bërë gjithçka kemi për të bërë të mundur për të mbrojtur vlerat dhe parimet tona, duke mbrojtur vendet tona, qytetarët tanë dhe të ardhmen e Europës.
Diskutuam edhe si do të ecim më tej, për të investuar më shumë në novacion, në ato fusha të Europës që i përkasin këtij komuniteti politik dhe në ato vende të cilat nuk i përkasin ende BE-së. Mendoj që dita ka qenë e frutshme dhe në fund pati pati përfundime shumë interesante të cilat do të çohen më tej nga danezët. Vendosëm që do të kemi një skuadër bashkërënduese të KPE-së nën kujdesin e zyrës së Presidentit të Këshillit Europian. Kjo ishte një sintezë e përgjithshme të asaj që bëmë sot, duke u përballur me faktin që sëbashku bëjmë një treg 600 miljonësh, për të cilin na takon të bëjmë atë që duhet ta shndërruar këtë potencial në rezultate pozitive”, tha Rama.
