Kryeministri Edi Rama ka deklaruar se qeverisja përballë realitetit ndryshon nga premtimet e bëra në opozitë, duke theksuar se pushteti sjell përgjegjësi dhe përplasje me probleme konkrete.
Gjatë një deklarate, Rama tha se në opozitë është e lehtë të bëhen premtime të mëdha, ndërsa në qeveri kërkohen zgjidhje për çështje komplekse.
“Në opozitë mund të premtosh gjithçka dhe nuk mban përgjegjësi, në qeveri do mbledhësh plehrat. Në opozitë mund të mbrosh gjithë zogjtë, në qeveri do luftosh me gjahtarët”, u shpreh Rama.
Ai u ndal edhe te çështja e pronave, duke thënë se qeverisja duhet të përballet me kategori të ndryshme pronarësh dhe situata të trashëguara ndër vite.
“Kthimi i të gjitha pronave është një premtim i lehtë në opozitë, por në qeveri duhet të trajtosh tre lloj pronarësh: ata me letra të vjetra, ata me legalizime dhe ata që kanë edhe dokumente të kooperativave”, tha kryeministri.
Rama deklaroi se çdo qeveri përballet me pakënaqësi, edhe kur përpiqet të jetë sa më e mirë, ndërsa kritikoi atë që e cilësoi si përdorim të konfliktit në politikë për përfitime.
“S’ka qeveri të përsosur dhe ne kemi probleme. Opozita kur merr trajta revolucionare duket tërheqëse. Sot jemi përballë një industrie fitimprurëse”, tha ai.
Kryeministri kritikoi gjithashtu ndikimin e rrjeteve sociale në formësimin e debatit publik, duke thënë se algoritmet favorizojnë konfliktin dhe emocionet negative.
“Kush mendon se me klikime dhe ndjekës bën politikë, bën gabim. Me këto ai u shërben oligarkëve më të mëdhenj që pasurohen çdo ditë”, deklaroi Rama.
Sipas tij, postimet që krijojnë konflikt dhe frikë shpërndahen më shumë në rrjetet sociale, duke krijuar një ekonomi të re të bazuar te vëmendja.
“Frika prodhon klikime, klikimet kohë dhe koha para. Ekonomia e vëmendjes është bërë ekonomi politike”, përfundoi Rama.
