Presidenti rus Vladimir Putin mendon që konfliktit me Ukrainën po i vjen fundi. Këtë e tha ai vetë duke iu drejtuar gazetarëve pas një parade ushtarake me masa të reduktuara në Moskë që shënoi fitoren e sovjetikëve në Luftën e Dytë Botërore.
“Mendoj se çështja po merr fund”, tha ai, duke iu referuar “operacionit të posaçëm ushtarak” në Ukrainë, ndërsa dënoi mbështetjen perëndimore për qeverinë e Kievit.
Shefi i Kremlinit bëri dhe një kthesë tjetër të papritur. Putin tha se do të ishte i gatshëm të negocionte marrëveshje të reja sigurie për Europën dhe se partneri i tij i preferuar negociues do të ishte ish-kancelari i Gjermanisë, Gerhard Schröder.
Ish-kancelari është një mik i hershëm i Putinit dhe i diskutueshëm për shkak të punës së tij për firmat shtetërore ruse të energjisë. Javën e kaluar, Presidenti i Këshillit Europian, António Costa, tha se kishte “potencial” që BE-ja të negocionte me Rusinë dhe se Zelensky e favorizonte një veprim të tillë.
