Drejtuesit e PSG kanë nisur të kërkojnë alternativa në rast se Bradley Barcola largohet nga klubi. Sulmuesi francez ende nuk ka firmosur kontratën e re, ndaj parizienët po shqyrtojnë emra të tjerë për të mos mbetur të papërgatitur në repartin ofensiv.
Sipas L’Equipe, objektivi kryesor i PSG është Gabriel Martinelli. Në Paris, braziliani i Arsenal shihet si kandidati ideal për të forcuar krahun e sulmit dhe për t’i dhënë më shumë mprehtësi fazës ofensive.
Raportohet se Arsenali, që po planifikon një ndryshim të madh në repartin sulmues gjatë verës, është i gatshëm ta lërë të lirë 24-vjeçarin për rreth 50 milionë paund.
Këtë sezon, Martinelli ka zhvilluar 46 ndeshje me klubin londinez, duke shënuar 11 gola dhe duke dhënë 6 asistime. Sipas Transfermarkt, vlera e tij aktuale në treg është 45 milionë euro.
