Ndërprerja e shërbimeve të Microsoft ka vijuar për më shumë se 12 orë, duke prekur miliona përdorues dhe institucione në mbarë botën. Problemet nisën të enjten, më 12 nëntor, dhe prekën kryesisht Outlook, Teams dhe Copilot, duke penguar komunikimin me email, organizimin e takimeve dhe zhvillimin e aktiviteteve të përditshme në kompani dhe institucione shtetërore.
Sipas Microsoft, shkaku lidhet me probleme në serverët e Exchange Online, të cilët mbështesin shërbimet e postës elektronike. Disa serverë u bënë papritur të padisponueshëm, duke krijuar ngarkesë të lartë në pjesën tjetër të infrastrukturës.
Përpjekjet për të ridrejtuar trafikun drejt serverëve funksionalë nuk dhanë rezultatet e pritshme, pasi edhe këta të fundit u mbingarkuan. Kjo krijoi një efekt zinxhir, ku serverët që riktheheshin në punë përballeshin menjëherë me një fluks të madh kërkesash dhe dështonin sërish.
Ndërprerja shkaktoi probleme në biznese, institucione qeveritare, shërbime shëndetësore dhe transport. Microsoft deklaroi se nuk kishte prova për ndonjë sulm kibernetik dhe se po aplikonte përditësime e masa teknike për rikthimin e shërbimeve.
Megjithatë, incidenti ka rihapur debatin mbi varësinë globale nga një numër i kufizuar kompanish teknologjike, pasi një defekt i vetëm në infrastrukturën e tyre mund të shkaktojë pasoja në shumë sektorë njëkohësisht.
