Fotot e pasaportës rrallëherë janë më të bukurat që kemi për veten. Ndriçimi në zyrën postare nuk është ideal dhe nuk na ndihmon fakti që nuk mund të shfaqim buzëqeshjen tonë më të mirë. Po e ke pyetur ndonjëherë veten pse nuk duhet të qeshësh në foton e pasaportës?
Përgjigjja lidhet me teknologjinë dhe sigurinë ndërkombëtare.
Shtetet e Bashkuara nuk e ndalojnë zyrtarisht buzëqeshjen. Megjithatë, Departamenti i Shtetit kërkon që fotot e pasaportës të kenë “një shprehje neutrale të fytyrës, me të dy sytë hapur dhe gojën të mbyllur”. Personi duhet të shikojë drejt dhe përballë kamerës. Edhe në Shqipëri vlen e njëjta gjë.
“Një aplikant mund të buzëqeshë në foton e pasaportës, për sa kohë që sytë janë hapur dhe goja është e mbyllur,” tha një zëdhënës.
Pra, nëse doni të dukeni pak më pozitivë, mund të përdorni një buzëqeshje të lehtë pa hapur gojën. Të tregosh dhëmbët nuk lejohet dhe kjo lidhet me sigurinë kufitare.
Arsyeja kryesore është përdorimi i teknologjisë së njohjes së fytyrës në aeroporte dhe pika kufitare. Shumë vende përdorin kompjuterë për të skanuar pasaportat dhe për të krahasuar fytyrat e udhëtarëve. Ndryshe nga njerëzit, makinat kanë nevojë për më shumë saktësi.
Algoritmet analizojnë detaje si distanca mes syve, veshëve, hundës dhe gojës, si dhe përmasat e fytyrës. Buzëqeshja mund t’i ndryshojë këto përmasa dhe ta bëjë më të vështirë identifikimin.
Ekspertët theksojnë se një buzëqeshje e gjerë me dhëmbë e bën më të vështirë verifikimin e formës së fytyrës dhe të syve, sidomos për teknologjinë biometrike.
Rregull global, jo vetëm amerikan
Shmangia e buzëqeshjes në fotot e pasaportës është një rregull që zbatohet në shumicën e vendeve. Megjithatë, mënyra se si përcaktohet “shprehja neutrale” mund të ndryshojë. Për shembull, në Francë nuk lejohet as ngritja e lehtë e cepave të buzëve.
Organizata Ndërkombëtare e Aviacionit Civil vendos standardet globale për dokumentet e udhëtimit, përfshirë edhe rregullat për fotot. Qëllimi është që identifikimi të jetë sa më i lehtë dhe i saktë.
Në fakt, këto rregulla janë përforcuar që nga viti 2004, me zhvillimin e teknologjisë së njohjes së fytyrës.
Megjithatë, në të kaluarën nuk ka qenë gjithmonë kështu. Në fillimet e pasaportave, rreth viteve 1920, nuk kishte pothuajse fare rregulla. Madje, ekzistojnë foto të vjetra ku njerëzit shfaqen me instrumente muzikore apo kapele të pazakonta. Me kalimin e viteve, rregullat janë bërë më të rrepta për arsye sigurie.
Çfarë ndodh nëse buzëqeshni në foto
Një nga arsyet më të zakonshme për vonesë në përpunimin e pasaportës janë fotot e papërshtatshme. Edhe një buzëqeshje e bukur mund të refuzohet nëse nuk përmbush kriteret.
Nëse dorëzoni një foto ku buzëqeshni shumë, autoritetet do ta vonojnë aplikimin dhe do t’ju kërkojnë një foto të re. Nëse nuk e dërgoni në kohë, aplikimi mund të mbetet pezull ose të refuzohet.
Rregullat ndalojnë edhe syzet, si dhe kapelet apo shamitë e kokës, përveç atyre fetare që përdoren vazhdimisht.
Gjithashtu, nuk lejohet as shtrëngimi i buzëve, rrudhja e fytyrës apo mimika të tjera të theksuara.
Për fëmijët, rregullat janë pak më fleksibile, pasi është më e vështirë të mbajnë një shprehje neutrale. Megjithatë, fytyra duhet të jetë e qartë dhe e dallueshme.
