Presidenti i Shteteve të Bashkuara, Donald Trump, pritej nga shumë që të ishte një prani e rregullt në Kupën e Botës. Megjithatë, deri tani ai nuk ka marrë pjesë në asnjë ndeshje, edhe pse kombëtarja amerikane ka fituar dy nga tri takimet e grupit dhe ka siguruar kualifikimin në fazën me eliminim.
A është kjo një surprizë? Pse mund të ketë qëndruar larg? Dhe a do të shfaqet ai para finales? BBC Sport ka analizuar situatën.
Në vitin 1994, kur Shtetet e Bashkuara organizuan për herë të parë Kupën e Botës, presidenti i atëhershëm Bill Clinton ishte i pranishëm në ndeshjen hapëse në Chicago. Ai mbajti një fjalim për të mirëpritur tifozët nga e gjithë bota, në një moment që sot duket edhe më i rëndësishëm, pasi 32 vite më vonë vendi po organizon sërish turneun, por presidenti aktual nuk është parë ende në stadium.
Në fillim të muajit, Trump e cilësoi Botërorin si më të suksesshmin në histori për sa i përket shitjes së biletave, duke forcuar bindjen se ai do të ishte një figurë e dukshme gjatë kompeticionit. Ai kishte luajtur gjithashtu rol të rëndësishëm në shortin e zhvilluar në Washington, ku mori edhe çmimin e parë “Peace Prize” nga FIFA, i dorëzuar nga Gianni Infantino.
Marrëdhënia mes Trump dhe Infantinos është forcuar vitet e fundit, me presidentin e FIFA-s që është pritur si në Shtëpinë e Bardhë, ashtu edhe në rezidencën e Trump në Mar-a-Lago. Megjithatë, kur SHBA luajti ndeshjen hapëse ndaj Paraguajit më 12 qershor në Los Angeles, Trump mungoi dhe në vend të tij udhëtoi Sekretari i Shtetit, Marco Rubio.
Sipas BBC Sport, Trump duket se i dha përparësi një eventi të UFC në oborrin e Shtëpisë së Bardhë, i zhvilluar dy ditë më vonë për të shënuar ditëlindjen e tij të 80-të dhe 250-vjetorin e Amerikës.
A duhet parë kjo si surprizë? Jo domosdoshmërisht. Federico de Jesus, strateg politik dhe ekspert komunikimi, thotë se kjo nuk është jashtë karakterit të Trump. Sipas tij, UFC është sporti me të cilin Trump ka ndërtuar një lidhje të veçantë, ndërsa kur bëhet fjalë për evente të mëdha sportive, ai zakonisht zgjedh momentin kryesor.
“Trump shkoi në Super Bowl, jo në ndeshje të zakonshme. Eventi kryesor është finalja e Kupës së Botës, aty ku do të jenë shikueshmëritë më të mëdha. Prisni të njëjtën gjë edhe këtë herë”, tha ai.
Trump nuk mori pjesë as në dy ndeshjet e tjera të SHBA-së, ndaj Australisë në Seattle dhe ndaj Turqisë në Los Angeles. Sipas De Jesus, presidenti mund të ketë qenë edhe i kujdesshëm pas fishkëllimave që mori në finalet e NBA në New York, sidomos duke pasur parasysh se ndeshjet e Botërorit kanë një publik më ndërkombëtar.
Një tjetër arsye mund të lidhet me debatet që kanë shoqëruar disa politika të administratës së tij për çështjet e jashtme dhe emigracionin. Për këtë arsye, stafi i tij mund të ketë qenë i shqetësuar për pritjen që ai mund të merrte në qytete si Los Angeles dhe Seattle, të dyja të njohura si bastione demokrate.
A do të shfaqet Trump para finales? Gianni Infantino ka konfirmuar se synimi është që Trump të jetë i pranishëm në finalen e 19 korrikut në New Jersey dhe të dorëzojë trofeun. Edhe vetë presidenti ka pranuar se i është kërkuar ta bëjë këtë.
Megjithatë, Andrew Giuliani, kreu i Task Forcës së Shtëpisë së Bardhë për Kupën e Botës, ka lënë të kuptohet se Trump mund të shfaqet edhe para finales.
“Ai i pëlqen surprizat. I pëlqen t’i mbajë njerëzit në tension. Prandaj, ndiqeni dhe do të shohim disa surpriza”, tha Giuliani.
Nga ana tjetër, duhet theksuar se axhenda e Trump ka qenë shumë e ngarkuar. Në periudhën e ndeshjes së parë të SHBA-së, ai po përgatitej për të udhëtuar drejt Francës për samitin e G7 dhe ishte i përfshirë edhe në negociatat për një marrëveshje paqeje me Iranin.
FIFA, sipas raportimit, është mirënjohëse për mbështetjen që ka marrë nga administrata amerikane gjatë turneut. Disa zyrtarë të lartë amerikanë kanë qenë të pranishëm në ndeshje, ndërsa Usha Vance përfaqësoi Shtëpinë e Bardhë në ndeshjen e SHBA-së ndaj Turqisë.
Në fund, për FIFA-n mund të mjaftojë që Trump të jetë i pranishëm në finale, për sa kohë që prania e tij nuk e dominon më shumë seç duhet ceremoninë. Por duke parë mënyrën si ai zakonisht e shfrytëzon vëmendjen e eventeve të mëdha, nuk do të ishte surprizë nëse shfaqet edhe më herët gjatë Botërorit.
