Partia Socialiste ka reaguar pas vendimit të Komisionit Qendror të Zgjedhjeve për të mos shpallur menjëherë rezultatet në Vorë dhe Njësinë nr. 10, duke e cilësuar atë si një vendim të pabazuar, që bie ndesh me logjikën e votimit elektronik dhe me përvojën e deritanishme zgjedhore.
Në deklaratën zyrtare, PS thekson se rezultati i votës është i paprekshëm dhe i garantuar, ndërsa u bën thirrje mbështetësve të saj për qetësi dhe për të shmangur çdo provokim, duke e cilësuar këtë moment si fillimin e një fitoreje historike për socialistët.
Deklaratë e Partisë Socialiste
Mosnxjerrja e rezultateve të Vorës dhe Njësisë 10 nga KQZ, me një vendim arbitrar që bie ndesh me logjikën e votimit elektronik, me traditën e shpalljes menjëherë të rezultatit, si edhe me vetë arsyen e investimit jo të vogël që është bërë për infrastrukturën elektronike, është një vendim arbitrar, i gabuar dhe zhgënyes për rolin e KQZ si garant i Sovranit popull, e jo i nevojave taktike të partive politike.
Jemi të keqardhur për këtë dhe u bëjmë thirrje Partisë Socialiste të Vorës si edhe mbështësve tanë në Vorë të ruajnë qetësinë.
Rezultati është në kuti dhe mos kini asnjë dyshim se asgjë dhe askush nuk e ndryshon dot atë. Ju jeni dallandyshja e parë e një fitoreje që do të jetë e paharrueshme në historinë e Partisë Socialiste.
Urime, urime, urime!
Të gjithë socialistët e përfshirë në proces në të gjithë Shqipërinë duhet të ruajnë qetësinë, t’u shmangen provokimeve dhe të nxjerrin me durim fitoren nga kutitë ku populli Sovran ka kyçur vendimin e tij historik.
