Kryeministri Edi Rama ka reaguar sërish pas protesës së djeshme të qytetarëve të mbajtur para kryeministrisë në lidhje me projektin në Zvërnec.
Në përfundim të ptotesës një grup të rinjsh kanë shkuar te selia e Partisë Socialiste dhe i janë drejtuar kryeministrit me thirrje ofenduese dhe sharje.
Duke ndarë pamjet në Facebook, shefi i qeverisë i cilësoi protestuesit si “mysafirë të paftuar të natës në selinë e Partisë Socialiste”, ndërsa tha se po përdorin gjuhë urrejtjeje.
Ai i krahasoi thirrjet “Shqipëria e shqiptarëve” me ideologji ekstremiste të së kaluarës, duke bërë paralelizma me lëvizje radikale në Evropë dhe duke i cilësuar ato si të rrezikshme për shoqërinë.
Rama shtoi se Shqipëria nuk duhet të bjerë pre “narrativave që synojnë të bllokojnë zhvillimin dhe investimet e huaja cilësore”, duke e konsideruar projektin në fjalë si pjesë të rëndësishme të zhvillimit ekonomik të vendit.
Reagimi i Ramës
MYSAFIRËT E PAFTUAR TË NATËS NË SELINË E PARTISË SOCIALISTE
“Shqipëria e shqiptarëve” dhe këto çeta kinse shqiponjash që ulërasin kësisoj rrugëve, të kujtojnë “Gjermaninë e gjermanëve” me ata ulëritësat e verbër si këta mysafirët e natës tek selia e PS, që e kthyen Gjermaninë në thertoren e hebrenjve dhe e katandisën në delen e zezë të planetit
Po meqë Gjermania naziste është larg dhe zëre se i kam përpara syve urrejtjenxitësit e këtyre të rinjve pa busull duke u thënë, “ju s’jeni nazistë ju jeni patriotë, prandaj jepini fort gojës së shthurrur se do ta djegim Shqipërinë e tradhëtarëve”, po shtoj që kjo “Shqipëria e shqiptarëve” është tëpkë si “Greqia e grekëve”, ajo e atyre çakejve të Agimit të Artë që donin t’i digjnin të gjallë “tradhëtarët” e Greqisë bashkë me shqiptarët, të cilët sipas tyre po merrnin punët e paratë e popullit grek.
Çuditërisht edhe ata ishin kundër investimeve e resorteve cilësore, me të vetmin ndryshim se këta “shqiptarët tanë të vërtetë” nuk kishin gisht në kuturisjen e atyre, kurse ata kanë gishtin e tyre në kuturisjen e këtyre.
