Deputetët e Parlamentit Evropian diskutuan për situatën në Serbi dhe protetat e studentëve. Që prej incidentit në Novi Sad, protestat studentore dhe qytetarë vazhdojnë prej muajsh kundër korrupsionit.
Ndërkohë, deputetët europianë kanë shprehur shqetësimin për incidentet ndaj demonstruesve dhe kërkuan hetim të plotë të tyre. Deputetët e BE-së kanë sqaruar për qytetarët dhe autoritetet në Serbi se të gjithë duhet të kenë të drejtën e lirisë së tubimit.
Në një debat të zhvilluar në Parlamentin e BE-së në Strasburg me kërkesë të socialdemokratëve, shumica e deputetëve mbështetën protestat. Marta Kos, Komisionerja Evropiane për Fqinjësi dhe Zgjerim, tha se pjesëmarrja e qytetarëve luan rol të rëndësishëm në zhvillimin e një shoqërie demokratike.
Ajo ka theksuar të drejtën për t’u mbledhur, e cila duhet të shprehet në mënyrë paqësore në përputhje me ligjin, dhe se dhuna nuk duhet të lejohet.
“Siç theksova në letrën time të hapur të botuar javën e kaluar në përgjigje të letrave të shumta që Komisioni mori, vlerat themelore janë në thelb të projektit tonë të përbashkët evropian, të cilin Bashkimi Evropian pret që të gjitha vendet ta përqafojnë dhe ta respektojnë. Kjo përfshin të drejtën për t’u mbledhur, e cila duhet të shprehet në mënyrë paqësore në përputhje me ligjin, dhuna nuk duhet të lejohet dhe policia duhet të sigurojë sigurinë e protestuesve”, tha ajo.
