Ambasada Amerikane në Tiranë iu ka bërë thirrje qytetarëve amerikanë që jetojnë në Shqipëri sot në 18 shkurt, që të shmangin protestën e 20 shkurtit, që parashikohet të mbahet nga Partia Demokratike në bulevardin “Dëshmorët e Kombit” në Tiranë.
Sipas njoftimit të Ambasadës së SHBA-ve, pritet që në 20 shkurt të ketë prani të madhe policore përreth bulevardit “Dëshmorët e Kombit”, mbyllje të rrugëve dhe ndërprerje të trafikut.
Kujtojmë se Partia Demokratike ka thirrur protestën e radhës përpara Kryeministrisë në datë 20 shkurt 2026.
Kreu demokrat Sali Berisha ka bërë thirrje për rrëzim të qeverisë Rama, duke u shprehur se maxhoranca duhet të bjerë, pasi ajo që di të bëjë është vetëm vjedhja e parave të qytetarëve.
“Protestuesit pritet të mblidhen pranë godinës së Kryeministrisë, e vendosur në Bulevardin “Dëshmorët e Kombit”, ndërmjet Sheshit “Nënë Tereza” dhe Sheshit “Skënderbej”.
Autoritetet kanë paralajmëruar për prani të shtuar të policisë, bllokime rrugësh dhe ndërprerje të qarkullimit në orët para dhe gjatë zhvillimit të protestës.
Sipas Policisë së Shtetit, ekziston mundësia që protestuesit të bllokojnë kryqëzime të ndryshme në zonën qendrore të qytetit.
Personeli i Ambasadës Amerikane është këshilluar të shmangë zonën e demonstratës. Qytetarëve amerikanë dhe publikut në përgjithësi u rekomandohet të ndjekin udhëzimet e autoriteteve vendore dhe të monitorojnë mediat lokale për përditësime”, lexohet në njoftimin e Ambasadës Amerikane.
