OMA është zgjedhur kompania fituese e garës ndërkombëtare për projekt ide arkitekturore për rilindjen e stadiumit ‘Selman Stërmasi’.
Në eventin që u zhvillua sot për shpalljen e fituesit 5 skuadra finaliste prezantuan përpara jurisë, projektet për një stadium krejtësisht të ri sipas standardeve të UEFA-s.
Kryetarja e jurisë ndërkombëtare Amanda Levete pasi shpalli kompaninë fituese bëri edhe sugjerime lidhur me projektin e tyre.
“Kemi disa sugjerime që do donim ti shohim në projektin tuaj të përfunduar, për të rafinuar formën e fasadave si për ndërtesat tregtare dhe për stadiumin. Do donim që ndërtesa që ju thatë se shënjon këtë ndërtesë, të jetë më pak ndërtesë dhe më shumë në formën e një kulle sahati dhe një obelisku. Ishim jo fort të bindur për aktivitetin publik në tarracë dhe sugjerojmë që përdorimi për energji diellore të jetë aty”, tha ajo.
Stadiumi “Selman Stërmasi” do të transformohet, duke u kthyer në një strukturë urbane të rigjallëruar, me sheshe publike të gjalla, hapësira të gjelbra dhe zona me përdorime të përziera për të stimuluar vitalitetin social dhe ekonomik.
