FIFA ka ndezur debate të forta para çerekfinales së Kupës së Botës mes Francës dhe Marokut, pasi ka vendosur që ndeshja të drejtohet nga një trupë arbitrash tërësisht argjentinase.
Vendimi ka shkaktuar reagime të shumta në botën e futbollit, duke marrë parasysh historinë e fundit mes Francës dhe Argjentinës, sidomos pas finales së Botërorit 2022, ku “Albiceleste” mposhti “Les Bleus” me penallti.
Arbitri kryesor i sfidës në Boston do të jetë Facundo Tello, 44 vjeç, i cili do të ndihmohet nga Juan Pablo Belatti dhe Gabriel Chade. Dario Herrera është caktuar arbitër i katërt, ndërsa edhe pjesa tjetër e stafit teknik do të jetë nga Argjentina.
Ky është rasti i parë në Botërorin 2026 që një ndeshje do të drejtohet ekskluzivisht nga zyrtarë të së njëjtës kombësi. Pikërisht ky detaj ka ngritur dyshime dhe diskutime, pasi Argjentina shihet si një nga rivalet direkte të Francës në garën për trofe.
Megjithatë, kampi francez ka tentuar të ulë tensionin. Dayot Upamecano u shpreh se skuadra nuk do të fokusohet te arbitrat, por vetëm te kundërshtari.
“Nuk do të merrem me faktin se kush do të jetë arbitri. Nuk e kemi bërë kurrë këtë më parë. Do të përqendrohemi te Maroku”, tha mbrojtësi francez.
Edhe portieri Robin Risser kërkoi qetësi, duke theksuar se nëse këta arbitra janë përzgjedhur, atëherë do të thotë se janë në nivelin e kompeticionit.
Në rrjetet sociale, tifozët kanë reaguar ndryshe. Shumë prej tyre kanë vënë në dyshim logjikën e këtij vendimi, duke pyetur nëse është normale që e gjithë trupa e arbitrave të vijë nga i njëjti vend, sidomos kur bëhet fjalë për një kombëtare që mund të jetë rivale direkte për titullin.
Pavarësisht polemikave, Franca duhet të qëndrojë e përqendruar te Maroku, një skuadër që ka treguar se mund të surprizojë çdo kundërshtar të madh. Çerekfinalja pritet të jetë një tjetër përballje e fortë në rrugën drejt trofeut.
