Një incident i rëndë është regjistruar në bordin e një avioni të kompanisë easyJet, ku një përleshje mes pasagjerëve detyroi devijimin e fluturimit dhe uljen emergjente në Kosovë.
Sipas mediave britanike, një grua, që besohet të jetë shtetase britanike, dyshohet se kishte konsumuar vodka dhe më pas ka shpërthyer në sjellje agresive, duke tentuar të godasë një pasagjer tjetër dhe duke i pështyrë në fytyrë.
VIDEO KETU
Ngjarja ndodhi në fluturimin që ishte nisur nga Gatwick Airport drejt Antalya, por për shkak të situatës së krijuar, avioni u detyrua të bëjë një ulje emergjente në Pristina International Airport.
Pamjet e publikuara nga një dëshmitar tregojnë momentet e tensionit në bord, ku stjuardesat përpiqen të qetësojnë situatën, ndërsa dy pasagjerë meshkuj përfshihen gjithashtu në përleshje.
Pas uljes në Prishtinë, policia hipi në avion dhe shoqëroi jashtë dy pasagjerë, një burrë dhe një grua, të cilët u larguan nga fluturimi nën masa sigurie.
Pavarësisht incidentit, fluturimi vijoi më pas drejt destinacionit përfundimtar, duke mbërritur në Turqi me rreth tre orë vonesë.
Në një reagim zyrtar, një zëdhënës i easyJet deklaroi se kompania nuk toleron sjellje shqetësuese dhe theksoi se siguria e pasagjerëve dhe ekuipazhit mbetet prioriteti kryesor.
