Nico Paz po kalon një formë spektakolare te Como në Serinë A, duke u shndërruar brenda pak muajsh në një futbollist elitar. Mesfushori 21-vjeçar është aktualisht nën vëzhgimin e rreptë të trajnerit të Argjentinës, Lionel Scaloni, pasi po lufton për një vend në skuadrën që do të përfaqësojë kampionët e botës në Botërorin e ardhshëm. Përparimi i tij i shpejtë ka bërë që vlera e tij në treg të shpërthejë, duke arritur shifrën e 65 milionë eurove.
Pavarësisht interesimit të madh nga klube si Interi, që janë gati të paguajnë shifra të larta, Real Madridi i ka të gjitha letrat në dorë. Klubi mbretëror ka vendosur të ushtrojë klauzolën e riblerjes prej vetëm 9 milionë eurosh në qershor të vitit 2026. Florentino Pérez dhe drejtuesit e Madridit nuk kanë ndërmend ta rishesin lojtarin për përfitim, por duan ta mbajnë në skuadër për të përforcuar repartin ofensiv me kreativitetin e tij.
Marrëveshja me Comon është e qartë dhe nuk lejon ndërhyrje nga klubet e tjera. Pas gjashtë muajve të fundit në Itali, ku Nico do të luajë “vallen” e tij finale, ai do të kthehet në “Santiago Bernabéu”. Te Reali janë të bindur se ai është një “diamant” i gatshëm për të shkëlqyer në ekipin e parë, duke mbyllur kështu një cikël rritjeje që nisi nga kategoritë e ulëta spanjolle deri në majat e futbollit evropian.
