Është ekstraduar nga Spanja drejt Shqipërisë Eralbi Breçani, djali i ish-zv.drejtorit të Policisë së Tiranës, Erzen Breçani, i akuzuar nga SPAK për përfshirje në trafik ndërkombëtar droge dhe grup të strukturuar kriminal.
Ai ishte shpallur në kërkim ndërkombëtar nga Gjykata e Posaçme (GJKKO) me kërkesë të Prokurorisë së Posaçme, pas zbërthimit të komunikimeve në aplikacione të koduara që, sipas hetimeve, lidhen me aktivitet kriminal.
Sipas dosjes hetimore, Eralbi Breçani dyshohet për trafikim të lëndëve narkotike në bashkëpunim, në kuadër të një grupi të strukturuar kriminal, si dhe për pastrim të produkteve të veprës penale.
Hetimet e SPAK e lidhin atë me rrjete të trafikut ndërkombëtar të kokainës nga Amerika Latine drejt porteve kryesore të Europës.
Pas mbërritjes në Shqipëri, ai do të përballet me masat ligjore dhe procesin gjyqësor në vijim.
