Një 62-vjeçar nga Përmeti është arrestuar pasi kishte përshtatur një ambient të banesës së tij në fshatin Qilarisht si thertore të paligjshme dhe dyshohet se mbetjet e therjeve i shkarkonte në lumin Vjosë.
Operacioni u zhvillua nga shërbimet e Komisariatit të Policisë Përmet dhe Seksionit për Hetimin e Krimeve Ekonomike e Financiare, në bashkëpunim me AKU Gjirokastër.
Gjatë kontrollit në ambientin e përshtatur si thertore u gjetën dhjetëra bagëti në proces therjeje, si dhe kafshë të therura. Gjithashtu, policia sekuestroi edhe dhjetëra matrikuj bagëtish, të cilat dyshohet se ishin të falsifikuara.
Hetuesit konstatuan edhe një tubacion përmes të cilit mbetjet e krijuara nga therja shkarkoheshin në lumin Vjosë, duke shkaktuar ndotje të ujërave dhe të mjedisit.
AKU bllokoi menjëherë ambientin ku zhvillohej aktiviteti i paligjshëm dhe vendosi ndaj pronarit një masë administrative prej 200 mijë lekësh të rinj.
“Në vijim të punës për parandalimin, evidentimin dhe goditjen e krimeve mjedisore, shërbimet e Komisariatit të Policisë Përmet dhe të Seksionit për Hetimin e Krimeve Ekonomike dhe Financiare, në bashkëpunim me AKU Gjirokastër, bazuar edhe në informacionet e siguruara se një shtetas kishte përshtatur një ambient si thertore jashtë kushteve minimale higjieno-sanitare dhe mbetjet e krijuara nga kjo veprimtari i hidhte në lumin Vjosë, ushtruan kontroll në këtë ambient.
Gjatë kontrollit në banesën e shtetasit A. L., u konstatua një ambient i përshtatur si thertore për bagëti të imta, ku u gjetën dhjetëra bagëti në proces therjeje, si dhe një pjesë e tyre të therura. Gjithashtu, u gjetën dhjetëra matrikuj për bagëti, të dyshuara të falsifikuara.
Në vijim të kontrollit, shërbimet e Policisë dhe të AKU-së konstatuan një tubacion përmes të cilit mbetjet e therjes shkarkoheshin dhe hidheshin në lumin Vjosë, duke shkaktuar ndotje të mjedisit dhe të ujërave.
AKU ndërhyri menjëherë duke bllokuar ambientin ku ushtrohej kjo veprimtari e paligjshme, nisi procedurat administrative përkatëse dhe ndëshkoi pronarin e ambientit me masë administrative 200 000 lekë të rinj.
Në përfundim të veprimeve, specialistët për Hetimin e Krimeve Ekonomike dhe Financiare arrestuan në flagrancë shtetasin A. L., 62 vjeç, banues në fshatin Qilarisht, Përmet, pronar i ambientit, për veprat penale “Fshehja e të ardhurave”, “Prodhimi i kundërligjshëm i artikujve dhe mallrave industriale dhe ushqimore”, “Falsifikimi i vulave, stampave ose formularëve” dhe “Ndotja e ujërave”.
Gjithashtu, u proceduan penalisht shtetasit L. D., 54 vjeç, dhe Y. H., 66 vjeç, të dy banues në Përmet, me detyrë veterinerë, për veprën penale “Shpërdorimi i detyrës”, pasi dyshohet se nuk kanë ushtruar kontrollet dhe nuk kanë marrë masat që u ngarkon ligji për bagëtitë e 62-vjeçarit.
Materialet procedurale iu referuan Prokurorisë, për veprime të mëtejshme.
Policia e Shtetit mbetet e vendosur në misionin e saj për evidentimin dhe goditjen e çdo veprimtarie të paligjshme që dëmton mjedisin, cenon sigurinë ushqimore dhe rrezikon shëndetin e qytetarëve“, thuhet në njoftimin e policisë.
