Inter ka realizuar një tjetër përmbysje spektakolare, duke mposhtur Udinesen 5-3 në “San Siro” pasi e pa veten në disavantazh të dyfishtë që në 16 minutat e para.
Abankwah dhe Ekkelenkamp i dhanë Udineses avantazhin 2-0, por reagimi zikaltër ishte i menjëhershëm. Carlos Augusto ngushtoi diferencën në minutën e 26-të, ndërsa Barella barazoi në të 35-ën, duke e çuar ndeshjen në 2-2 përpara pushimit.
Në pjesën e dytë, skuadra e Chivut mori kontrollin. Thuram realizoi golin e përmbysjes për 3-2, Pio Esposito shtoi të katërtin, ndërsa Bonny vulosi fitoren me golin e pestë. Udinese shënoi edhe një herë në minutat e fundit, por pa mundur ta rihapte realisht takimin.
Fitorja merr edhe më shumë rëndësi pasi Interi tani qëndron në krye së bashku me Romën, kundërshtarin e radhës. Dy skuadrat do të përballen të shtunën në “Olimpico” në një duel direkt për vendin e parë.
Megjithatë, Chivu ka edhe shqetësime pas kësaj ndeshjeje. Calhanoglu mungoi për shkak të një problemi muskulor, ndërsa John Stones u detyrua të largohej në pjesën e dytë për shkak dëmtimi. Tetë golat e mbrëmjes treguan fuqinë e Interit në sulm, por edhe problemet që vazhdojnë në mbrojtje.
