Prej ditës së djeshme vazhdon rinumërimi i votave në Tiranë. Por deri tani nuk ka asgjë që mund të përmbysë rezultatin e përcaktuar në 11 Maj. Anëtari i Komisionit të Ankimeve dhe Sanksioneve, Ledio Braho u shpreh se deri tani lëvizja e vogël e votave tregon vetëm gabime njerëzore.
“Duke pasur vota që kanë qenë të diskutueshme, janë zgjidhur me vendimmarrje të KAS. Ideja nuk ishte për provë, kishte të bënte me transparencën dhe pretendime kryesisht të kandidatëve, janë numëruar më pak se 10% të votave, si PS dhe PD kanë humbur vota nga ky proces, disa kandidatë ka rezultuar se kanë vota të pamerituara.
Janë çështje subjektiviteti të grupeve të numërimit. Deri tani s’kemi pasur asnjë rast që të konsiderohet i qëllimshëm. Për në Dibër, ka dyshime se është ndërhyrë në kuti. Te Tirana deri tani nuk mund të them.
Dje ishim të pakënaqur me ritmin, sot janë marrë masat që procesi të ndahet me dy turne, në mënyrë që numëruesit të ndërrohen. Shpresojmë të ecim me ritëm të shpejtë, por qarku i Tiranës kërkon më shumë njerëz dhe shto këtu presionin nga vëzhguesit.
Ne nuk jemi në fazën që të kemi vlerësuar provat, PS dhe PD i kanë të gjitha procesverbalet nga ato kuti, mesa kuptova kishte disa mospërputhje në disa qendra votimi. Është diçka që duhet trajtuar me kujdes, lidhur edhe me videot që qarkulluan. Duhet të kuptojmë se çfarë ka ndodhur ditën e zgjedhjeve” tha Braho.
