Tensionet në tregtinë SHBA-BE: Takimi i rëndësishëm në Bruksel
Komisioni Evropian konfirmoi se përfaqësuesi tregtar amerikan, Jamieson Greer, do të takohet me shefin e tregtisë të BE-së, Maroš Šefčovič, më 23 nëntor në Bruksel. Takimi pritet të jetë i tensionuar, pasi SHBA po ushtron presion mbi Bashkimin Evropian për të rishikuar legjislacionin që konsideron të dëmshëm për kompanitë amerikane dhe për të përshpejtuar zbatimin e marrëveshjes mes Presidentit Donald Trump dhe kryetares së Komisionit, Ursula von der Leyen, e cila parashikon heqjen e tarifave për të gjitha mallrat industriale amerikane.
Në gusht, Komisioni Evropian prezantoi një legjislacion që ul tarifat për mallrat amerikane, për të siguruar lehtësira për automjetet dhe pjesët e tyre. Megjithatë, Parlamenti Evropian dhe Këshilli nuk kanë miratuar këtë legjislacion, duke testuar durimin e Uashingtonit. Takimi i Greer dhe Šefčovič do të zhvillohet një ditë përpara takimit të sekretarit amerikan të tregtisë, Howard Lutnick, me ministrat e tregtisë të BE-së.
Marrëveshja “Turnberry”, e nënshkruar në korrik, parashikon që BE të paguajë tarifa prej 15% për eksportet në SHBA dhe të heqë tarifat për shumicën e mallrave amerikane që arrijnë në BE. Megjithatë, SHBA po kërkon më shumë dhe po ushtron presion për anulimin e rregulloreve digjitale dhe klimaterike që Washingtoni i konsideron si pengesa “jo-tarifore” për tregtinë.
Brukseli këmbëngul që nuk do të dorëzohet në të drejtën e tij “sovrane” për të legjislatuar, përfshirë rregullat për teknologjinë amerikane. Më 13 nëntor, Komisioni nisi një hetim për Google, që dyshohet se po i jep prioritet të ulët lajmeve në rezultatet e kërkimit. Tensionet pritet të shtohen më shumë, pasi Brukseli dëshiron të ndryshojë disa terma të marrëveshjes së korrikut për një marrëdhënie më të ekuilibruar.
Ligjvënësit e BE-së shprehin gatishmërinë për të amenduar kushtet e marrëveshjes me SHBA-në. Kryetari i komitetit për tregtinë në Parlamentin Evropian, Bernd Lange, ka paraqitur një raport draft që propozon mbajtjen e tarifave mbi çelikun dhe aluminin amerikan, pasi SHBA vazhdojnë t’i mbajnë ato në 50%. Ai gjithashtu propozon që heqja e tarifave për mallrat amerikane të ndodhë për 18 muaj dhe të zgjatet vetëm në bazë të një raporti të Komisionit mbi ndikimin e tyre në tregun e BE-së. Shtetet anëtare të BE-së dhe Parlamenti shpresojnë të arrijnë një marrëveshje deri në pranverë.
