Partia Demokratike do të mbledhë Kryesinë e saj të mërkurën, më 27 maj 2026, në prag të Kuvendit Kombëtar që do të zhvillohet më 30 maj.
Lajmi është bërë i ditur përmes një mesazhi të shpërndarë nga drejtuesit e PD-së për anëtarët e Kryesisë, ku bëhen të ditura edhe çështjet kryesore që do të diskutohen në takim.
Mbledhja, e cila do të nisë në orën 19:00, pritet të fokusohet në vendimmarrje të rëndësishme organizative dhe politike për forcën më të madhe opozitare.
Në qendër të diskutimeve do të jenë ndryshimet në statut, propozimet për përbërjen e organeve drejtuese, si dhe masat organizative për zhvillimin e Kuvendit Kombëtar.
Sipas rendit të ditës, janë parashikuar këto pika:
- Shqyrtimi i propozimeve të grupit të punës për ndryshimet në statut.
- Shqyrtimi i propozimeve të kryetarit të partisë për listën e kandidatëve që do t’i propozohen Kuvendit Kombëtar për anëtarë të Këshillit Kombëtar të PD-së.
- Masat organizative për mbledhjen e Kuvendit Kombëtar të 30 majit 2026.
- Të tjera.
