Ndërsa diskutimet në Kuvend kaluan në pikën e dytë të rendit të ditës të kërkuar dhe dakordësuar mes opozitës dhe mazhorancës për kërkesat e Komisioneve parlamentare Hetimore, u debatua për zgjedhjet e 11 majit.
Nga opozita fjalën e mori deputetja e PD-së, Albana Vokshi, e cila kërkoi të drejtën kushtetuese për ngritjen e Komisionit Parlamentar për hetimon e zgjedhjeve të 11 majit, ku u përdor administrata dhe pushteti qeveritar për të tjetërsuar votën e qytetarëve.
“Ngritja e Komisionit Hetimor garantohet me Kushtetutë, mjafton një e katërta e deputetëve dhe është e detyrueshme, por ju nuk e doni. Më 11 maj pati farsë elektorale. E thotë raporti i OSBE/ODIHR, partia shtet. Ne i kemi me fakte, ndaj ju nuk e doni këtë Komision hetimor për zgjedhjet e 11 majit dhe ndërhyrjen e administratës. Ne duam që t’i paraqisim të 4500 provat e gjetura. U ngrit sistem monstruoz patronazhimi, u profilizuan votuesit dhe nëpërmjet tij shfrytëzonin çdo nevojë të tyre, për t’u dhënë shërbime në këmbim të votës. Njëlloj edhe në diasporë, e ka denoncuar edhe zoti Berisha”, tha Vokshi mes të tjerash.
Ligjvënësja demokrate renditi edhe disa problematika dhe raste të evidentuara, duke theksuar se në krye të skemës monstruoze elektorale ishin kryeministri Edi Rama dhe zëvendësja e tij, Belinda Balluku.
“Madje edhe Belinda Balluku, ka kryer shumë krime elektorale, ka ngritur një sistem monstruoz elektoral, për çdo gjë, e kontrolluar kudo, deri edhe çfarë ilaçesh përdornin votuesit. Apo çfarë hallesh kishin. I dhanë 135 licenca kanabisi, leje ndërtimi, bonusi i pensionistëve gjatë fushatës, asfalti elektoral, i kemi me fakte të gjitha këto, të dokumentuara. Ndërhyrja e organizatave kriminale, kartelet e drogës, në të 12 qarqe dhe të gjitha bashkitë, me emra dhe foto. Kanë mbështetur 28 deputetë, nga të cilët 25 janë këtu në sallë dhe nuk përfaqësojnë vullnetin e qytetarëve, përfaqësojnë kartelet e drogës dhe bandat kriminale”, u shpreh ajo.
Vokshi tha se menjëherë pas zgjedhjeve, Rama firmosi leje ndërtimi për bandat kriminale dhe kartelet, për t’i shpërblyer me kulla.
Ndërsa tha se administrata u përfshi në fushatë elektorale, patronazhistët blenë vota në këmbim të parave dhe shpërblimeve sipas nevojës së votuesve dhe madje DHL shkeli procesin me votën e Diasporës.
“Pas zgjedhjeve vetë Rama ka firmosur dhjetëra leje ndërtimi nëpër qytete, të dhëna anëtarëve të bandave kriminale dhe karteleve, deri tek ata në kërkim. Kanë firmosur vetë Rama dhe Balluku, si dhe Adelajda Rrokaj, edhe pse i kishte në kërkim dy vëllezërit, për llogari të Suel Çelës. Vota e Diasporës u manipulua e dhunua, nuk ishte reale vota që erdhi, 100 mijë votuesve iu refuzua e drejta, DHL shkeli procesin në të gjitha fazat”, u shpreh ligjvënësja demokrate nga foltorja, duke theksuar se mazhoranca për këto shkaqe e refuzon ngritjen e këtij komisioni.
