Qeveria spanjolle i ka kërkuar TikTok-ut të pezullojë aktivitetin në vend deri në heqjen e të gjitha materialeve që përmbajnë abuzim seksual me fëmijët. Kërkesa u bë pas një hetimi të publikuar nga organizata jofitimprurëse Maldita.es, e cila identifikoi 1.183 postime eksplicite në platformë, të cilat kishin marrë të paktën 48 milionë shikime.
Ministrja e Rinisë dhe Fëmijërisë, Sira Rego, i kërkoi Prokurorisë dhe Agjencisë për Mbrojtjen e të Dhënave të ndërmarrin masa ndaj kompanisë. Ajo deklaroi se rrjetet sociale nuk mund të funksionojnë si hapësira pa ligj, duke theksuar nevojën për mbrojtjen e fëmijëve dhe të miturve. Sipas hetimit, më shumë se 26 mijë profile kishin komentuar ose shpërndarë materialet e identifikuara.
Ministria spanjolle nuk ka kompetencë ta ndalojë e vetme funksionimin e platformës, ndaj i është drejtuar institucioneve përgjegjëse për të shqyrtuar masat ligjore. TikTok nuk kishte dhënë ende një koment për kërkesën. Organizata Maldita.es raportoi se kompania kishte kufizuar dy terma kërkimi të lidhur me materialet në Spanjë, por përmbajtja vazhdonte të shfaqej përmes kërkimeve nga vende të tjera evropiane.
