Álvaro Arbeloa dëshiron t’i japë projektit të tij të ri te Fulham një identitet madrilen, duke synuar disa prej talenteve që njeh mirë nga koha e tij te Real Madridi.
Objektivi kryesor i trajnerit spanjoll është Gonzalo García. Sipas “The Athletic”, bisedimet mes Fulhamit dhe Real Madridit janë në një fazë të avancuar, ndërsa marrëveshja mund të kalojë vlerën e 30 milionë eurove.
Gjithçka do të varet nga vendimi përfundimtar i sulmuesit 22-vjeçar. Madrilenët janë të kënaqur me paraqitjet e tij, por mund ta lejojnë largimin për të siguruar të ardhura pas investimeve të mëdha të kësaj vere.
Arbeloa nuk është ndalur vetëm te Gonzalo. Sipas “Mundo Deportivo”, ai kërkon në Londër edhe César Palacios, mesfushorin 21-vjeçar që e ka stërvitur te Castilla dhe të cilit i ka dhënë mundësi edhe me skuadrën e parë.
Konkurrenca e fortë në mesfushën e Real Madridit mund ta shtyjë Palaciosin drejt një transferimi, ndërsa klubi nuk pritet ta pengojë nëse mbërrin një ofertë e përshtatshme.
Nëse të dyja marrëveshjet realizohen, Fulhami do të shtojë në skuadër dy prej talenteve më premtuese të akademisë madrilene.
