Mira Murati po përgatitet të sjellë një tjetër risi që mund të ndryshojë mënyrën si komunikojmë me Inteligjencën Artificiale. Startup-i i saj, po zhvillon një model të ri IA që synon t’i bëjë bisedat me teknologjinë shumë më natyrale dhe më të afërta me komunikimin njerëzor.
Ndryshe nga chatbot-et aktuale, ku përdoruesi flet dhe më pas pret përgjigjen, sistemi i ri do të jetë në gjendje të dëgjojë dhe të përgjigjet pothuajse në të njëjtën kohë. Kjo do ta bëjë ndërveprimin të ngjajë më shumë me një telefonatë reale sesa me një shkëmbim mesazhesh.
Teknologjia mbështetet te sistemi “full duplex”, ndërsa kompania pretendon se modeli eksperimental “TML-Interaction-Small” arrin të reagojë në vetëm 0.40 sekonda, afërsisht ritmi i një bisede normale mes njerëzve dhe më i shpejtë se disa modele ekzistuese të OpenAI dhe Google.
Megjithatë, projekti ndodhet ende në fazë eksperimentale dhe nuk është ende i disponueshëm për publikun. Sipas kompanisë, një version i kufizuar për kërkime pritet të prezantohet në muajt e ardhshëm, ndërsa një lançim më i gjerë mund të vijë brenda këtij viti.
Ekspertët e teknologjisë vlerësojnë se, nëse performanca që premton kompania konfirmohet edhe në përdorim real, kjo mund të përfaqësojë një nga ndryshimet më të mëdha në mënyrën si njerëzit ndërveprojnë me Inteligjencën Artificiale.
Tashmë mbetet për t’u parë nëse projekti i ri i Mira Muratit do të arrijë të përmbushë pritshmëritë e larta që ka krijuar në botën e teknologjisë.
