Milani pësoi një humbje të rëndë në shtëpi ndaj Parmës, duke u mposhtur 0-1 në San Siro dhe duke e bërë edhe më të vështirë ndjekjen e Interit në garën për titull. Golin vendimtar për emilianët e shënoi Mateo Troilo në minutën e 80-të pas një goditjeje këndi, me vendimin që u konfirmua edhe nga VAR-i.
Ndeshja u ndërlikua herët për kuqezinjtë, pasi Ruben Loftus-Cheek u dëmtua në përplasje me portierin Corvi dhe u zëvendësua që në minutën e 11-të nga Jashari. Milani dominoi në pjesë të gjata dhe krijoi raste, me Rafael Leão që goditi edhe shtyllën, por nuk arriti të gjente golin e barazimit.
Kjo disfatë i ndërpreu Milanit një seri prej 24 ndeshjesh pa humbje dhe 19 ndeshjesh radhazi duke shënuar, ndërsa theksoi edhe luhatjet në shtëpi në javët e fundit.
