Zbërthimi i mesazheve të aplikacionit të koduar SKY ECC ka sjellë një valë të re hetimesh mbi krimin e organizuar, duke hedhur dritë mbi ngjarje të bujshme kriminale.
Gazetarja Klodiana Lala, në një intervistë për emisionin “Kjo Javë” në News24, deklaroi se këto të dhëna po ndihmojnë autoritetet të kryqëzojnë informacione dhe prova, duke mundësuar ndjekjen penale të personave të përfshirë.
Sipas Lalës, aplikacioni SKY ECC është përdorur gjerësisht për komunikime që lidhen me vrasje mafioze, trafikun e drogës nga Amerika Latine drejt Europës dhe korrupsionin zyrtar. Operacioni i fundit në Greqi, i cili përfshiu edhe persona me origjinë shqiptare, ka nxjerrë në pah emra të njohur të botës së krimit, përfshirë Aleksandër Sadikajn, i cili u vra me eksploziv në vitin 2022.
Lala tregoi se mesazhet e SKY ECC kanë zbuluar përplasje që datojnë që prej vitit 2020, kur u tentua vrasja e Rubi Kalemit nga Ari Papa.
Në maj 2021, Ari Papa u vra në Greqi, duke hapur një zinxhir ngjarjesh të dhunshme, përfshirë ekzekutimin e Aleksandër Sadikajt dhe Edmond Papës, si dhe masakrën e Memaliajt, ku mbetën të vrarë Shyqyri Kalemi dhe dy persona të tjerë të pafajshëm.
Ndër personat e implikuar figuron edhe Sandër Pemaj, i dënuar nga drejtësia greke për trafikun e 1.2 tonë kokainë nga Karaibet. Sipas Lalës, Pemaj ka drejtuar aktivitetin e tij kriminal nga burgu.
“Në maj 2021 vritet Ari Papa në Greqi, këtu më pas, ky informacion i ri, mund ti shërbejë edhe prokurorisë shqiptare. Pas vrasjes së Sadikajt, u vra Edmond Papa, patëm masakrën e Memaliajt që u vra Shyqyri Kalemi dhe dy persona të tjerë që s’kishin lidhje me këto përplasje. Këto të dhëna mund të hedhin dritë mbi këto krime.
Një tjetër personazh që rezulton i implikuar është Sandër Pemaj, i dënuar nga drejtësia greke. Ai konsiderohej për trafikun e 1.2 tonë kokainë nga Karaibet. Aktivitetin e trafdikut e drejtonte nga burgu”, tha Lala.
