Në prag të finales së Conference League ndaj Chelsea-s, braziliani Antony ka folur edhe njëherë tjetër për situatën e vështirë që kaloi te Manchester United dhe “shpëtimin” e karrierës që i solli transferimi në janar te Betis.
“Kalova një kohë shumë të vështirë kur isha te Manchester United, nuk ndjeja më asnjë lloj kënaqësie. Qëndroja vetëm i mbyllur në dhomë, ditë të tëra pa ngrënë asgjë. Nuk kisha as forcë për të luajtur me tim bir. I thoja vëllait se nuk po e përballoja dot më atë situatë, nuk isha më i lumtur.
Pastaj erdhi transferimi te Betis, që më ndihmoi shumë të rigjea veten dhe dëshirën për të luajtur futboll dhe për të bërë gjërat që doja të bëja”, tha braziliani në një intervistë për TNT Brazil.
Antony nesër do të luajë ndeshjen e fundit me Betis, pasi në fund të sezonit i mbaron kontrata e huazimi, për t’u rikthyer përkohësisht te Manchester United, pasi nuk është në planet e Ruben Amorim dhe i duhet të gjejë një ekip të ri. Por, duke parë formën e shkëlqyer që ka treguar me Betis, interesi për të është rritur shumë dhe e duan disa klube të mëdha.
