Refuzimi i vazhdueshëm i kryeministrit në detyrë dhe liderit të Lëvizjes Vetëvendosje, Albin Kurti, për të folur para mediave ka shkaktuar reagim të ashpër nga gazetarët në Kosovë.
Ata kanë vendosur mikrofonët dhe kamerat e tyre në tokë këtë të mërkurë, në kohën që kryeministri në detyrë, Albin Kurti, po dilte nga ndërtesa e Kuvendit të Kosovës për të shkuar në Qeveri.
Ky veprim i gazetarëve ka ndodhur në shenjë proteste, pasi Kurti nuk ka dhënë asnjë deklaratë për mediat në asnjërën nga 5 mbledhjet e Kuvendit, bën me dije Asociacioni i Gazetarëve në Kosovë.
“Asociacioni i Gazetarëve të Kosovës i fton të gjithë aktorët politikë, dhe në këtë rast më së shumti kryetarin e partisë që ka fituar më së shumti ulëse në Kuvend, që të jetë transparent me mediat dhe publikun, për një temë kaq të rëndësishme siç është konstituimi i legjislaturës së re,” tha Asociacioni i Gazetarëve në Kosovë.
Ndërkohë, krijimi i institucioneve të reja të Kosovës pas zgjedhjeve të 9 shkurtit ka ngecur me seancën e pestë që u mbajt këtë të mërkurë, e cila dështoi sërish në zgjedhjen e kryetarit të ri të Kuvendit.
Seanca e radhës do të vazhdojë brenda 48 orëve, ditën e premte, ndërsa palët duken të jenë larg një zgjidhjeje. Përpara seancës, kryesuesi Avni Dehari mblodhi në një takim përfaqësuesit e partive politike, por pa asnjë rezultat.
Edhe sot, Lëvizja Vetëvendosje, si parti e parë, bëri të njëjtin propozim.
“Propozoj Albulena Haxhiun. Ju ftoj të votoni, të mos e mbani më të bllokuar këtë proces,” tha deputeti i Lëvizjes Vetëvendosje, Glauk Konjufca.
Haxhiu siguroi vetëm 57 vota nga të paktën 61 të nevojshme për t’u zgjedhur. Kryetari i Partisë Demokratike të Kosovës, Memli Krasniqi, akuzoi Vetëvendosjen se po e çon vendin në një fazë që s’ka qenë kurrë më parë.
“Lëvizja Vetëvendosje, së cilës i takon ta propozojë kryetarin e Kuvendit… ka vendosur ta mbajë peng shtetin, për shkak të tekeve të tyre, për një emër të përveçëm. Nuk mund t’ua imponojnë emrin deputetëve të opozitës. Mentaliteti arbitrar i marrjes së votës me zor nuk ka vend në një sistem demokratik,” u shpreh Memli Krasniqi, kryetar i PDK.
Krasniqi tha se Vetëvendosja e di kush janë dy emrat brenda saj që mund të marrin mbështetjen e opozitës, por pavarësisht kësaj, vendos të mbajë të bllokuar procesin.
Ndërsa nga Lidhja Demokratike e Kosovës kanë thënë se nuk do të mbështesin asnjë kandidat të Vetëvendosjes për shkak të sjelljes së tyre dhe gjuhës përçarëse.
Haradinaj nga Aleanca për Ardhmërinë e Kosovës ishte në të njëjtin qëndrim me Partinë Demokratike, duke kërkuar nga LVV propozimin e një kandidature unifikuese, teksa kjo e fundit ka thënë se kontestimi i emrit të zgjedhur është i papranueshëm.
