RAF Fairford, një bazë e Forcave Ajrore Mbretërore britanike në Gloucestershire, ka një histori të gjatë bashkëpunimi me Forcat Ajrore të SHBA-së. Përdorimi i saj nga amerikanët nisi gjatë Luftës së Ftohtë dhe në vitin 1951 baza iu transferua zyrtarisht Forcave Ajrore amerikane. Që atëherë, Fairford është përdorur për avionë bombardues strategjikë dhe për operacione të rëndësishme ushtarake amerikane në Evropë.
Rëndësia e bazës u bë veçanërisht e dukshme gjatë Luftës së Gjirit në vitin 1991, kur bombarduesit amerikanë B-52 u vendosën në Fairford për të marrë pjesë në fushatën ajrore kundër Irakut. Baza është përdorur gjithashtu në operacionet e NATO-s në Kosovë në vitin 1999 dhe gjatë viteve të fundit ka shërbyer si një pikë e rëndësishme për vendosjen e bombarduesve amerikanë B-1 dhe B-52.
Më 5 qershor 1944, në prag të zbarkimit të Normandisë, 45 avionë Stirling u nisën nga Fairford me rreth 900 parashutistë. Ata u hodhën në Normandi në orët e para të 6 qershorit, ditën e D-Day.
Sot, rëndësia e RAF Fairford është rritur sërish për shkak të luftës me Iranin. Qeveria britanike ka autorizuar përdorimin e bazës nga ushtria amerikane për operacione kundër objekteve iraniane të lidhura me sulmet ndaj anijeve në ngushticën e Hormuzit. Irani ka paralajmëruar më herët se bazat që përdoren për sulme amerikane mund të konsiderohen objektiva.
Pikërisht në këtë kontekst, baza u vu sot në qendër të vëmendjes. Policia britanike arrestoi disa persona nën dyshimin për shkelje të ligjeve mbi eksplozivët, ndërsa u shpall një “incident madhor” në zonën pranë Fairford. Një ekip i ushtrisë britanike për çaktivizimin e eksplozivëve po kontrollon disa automjete dhe banorët e disa banesave në fshatin Whelford u evakuuan. Autoritetet thanë se situata është nën kontroll, ndërsa hetimi drejtohet nga policia kundër terrorizmit. Deri tani, autoritetet nuk kanë konfirmuar se arrestimet lidhen drejtpërdrejt me bazën ose me Iranin.
