Sot, përveç pikëve të javës së 26-të në Premier League, ndeshja West Ham–Manchester United ka edhe një “histori” speciale: sfidën e tifozit të njohur Frank Ilett, i cili më 5 tetor 2024 u betua se nuk do t’i priste flokët derisa Manchester United të fitonte pesë ndeshje radhazi.
Aktualisht, “Djajtë e Kuq” janë në një seri prej katër fitoresh, pasi kanë mposhtur Manchester City-n, Arsenal-in, Fulham-in dhe Tottenham-in. Nëse fitojnë edhe ndaj West Ham, do të arrijnë numrin “magjik” të pesë fitoreve dhe kjo do t’i japë Ilett-it më në fund “lejen” për t’i prerë flokët.
Kjo histori është kthyer në një sensacion në rrjetet sociale dhe shihet si një shembull argëtues i mënyrës se si pasioni për një klub futbolli mund të sjellë sfida të papritura. Më herët, Ilett ishte afër që ta përfundonte sfidën kur United arriti tre fitore radhazi nën drejtimin e Ruben Amorim, por seria u ndërpre përpara se të shkonte në pesë.
