Në vitin 2024 mungesa e fuqisë punëtore në Shqipëri u thellua edhe më tej, duke u bërë një nga faktorët kryesorë që po shtrëngon tregun e punës. Këtë tregojnë analizat e Bankës së Shqipërisë në raportin e fundit të politikës monetare.
“Rritja e ngadaltë e punësimit gjatë tremujorit të tretë të vitit 2024, sipas të dhënave administrative, është shoqëruar nga nivele të larta të faktorit “mungesë e forcës së punës” gjatë gjithë vitit. Këto zhvillime sugjerojnë praninë e kushteve vazhdimisht të shtrënguara në tregun e punës.”
Të dhënat e Bankës Qendrore tregojnë se bizneset po hasin vështirësi në rekrutimin e punonjësve, duke sinjalizuar kështu një sfidë afatgjatë për ekonominë.
“Gjithashtu, treguesit e vrojtimeve dëshmojnë për pritje më të ulëta të bizneseve për punësimin dhe për papunësi më të lartë nga konsumatorët, gjatë 3-mujorit të 4-ërt.”
Faktori “mungesë në forcën e punës” ka gjasa të ndikojë tregun e punës edhe në vitin 2025, pasi Banka e Shqipërisë parashikon që rritja e kërkesës për mallra e shërbime do të shoqërohet me krijim të vendeve të reja të punës.
